Bilimli nesil — kuwwatly Watan
24.03.2021
Hormatly Prezidentimiziň amala aşyrýan uly özgertmeleri zehinli ýaşlaryň ukyp-başarnyklaryny goldamak üçin şertleri döretmäge gönükdirilendir. Mähriban Arkadagymyz medeniýet we sungat işgärlerine uly goldaw berýär, olaryň işlemegi, türkmen halkynyň özboluşly mirasyny wagyz etmekde täze üstünlikleri gazanmagy hem-de bu ulgamy mundan beýläk-de kämilleşdirmegi, ösüşiň täze derejesine çykarmagy üçin ähli şertleri döredýär. Şeýlelikde, milli Liderimiziň taýsyz tagallalary bilen ýurdumyzda häzirki döwrüň talaplaryna laýyklykda, medeniýeti, sungaty ösdürmek işinde öňegidişlikler gazanylýar. Eziz Watanymyzyň şäherlerinde we obalarynda döwrebap medeniýet öýleriniň hem-de köşkleriniň, kitaphanalaryň, muzeýleriň medeni maksatly beýleki desgalaryň gurulmagy bizi diýseň guwandyrýar, işimize has-da kämilleşmäge itergi berýär. Biziň çagalar sungat mekdebimiziň agzybir mugallymlary hem ýaş nesillere terbiýe bermekde, sungatyň inçe ýollaryny öwretmekde ýadawsyz zähmet çekýärler. Çagalar sungat mekdebimizde ýaş nesiller dürli ugurlar boýunça bilim alýarlar, olar ýurdumyzda geçirilýän baýramçylyk çärelerinde, teleýaýlymlarda, hasabat konsertlerinde çykyş edip gelýärler.
Okuwçylarymyz Türkmenistan — Bitaraplygyň mekany ýyly mynasybetli, Türkmenistanyň Medeniýet ministrliginiň guramagynda çagalar sungat mekdeplerini 2019 — 2020- -nji okuw ýylynda tamamlan okuwçylaryň arasynda dürli hünär ugurlary boýunça geçirilen «Bitaraplyk waspy dillerde dessan” atly döredijilik bäsleşigine gatnaşyp, baýrakly orunlara mynasyp boldular. Häzirki wagtda Türkmenistan — parahatçylygyň we ynanyşmagyň Watany ýylynda çagalar sungat mekdepleriniň okuwçylarynyň arasynda dürli hünär ugurlary boýunça geçiriljek bäsleşige ýokary derejede taýýarlyk görýäris.
Gahryman Arkadagymyzyň ýolbaşçylygynda möhüm işleriň durmuşa geçirilýändigini, şöhratly ata-babalarymyzdan miras galan aýdym-saz sungatymyzy ösdürmäge, halypa-şägirtlik ýoluny dowam etdirmäge, sungat ussatlarymyzyň baý medeni mirasyny dünýä ýaýmaga goşandymyzy goşmak üçin zehinimizi, ukyp-başarnygymyzy gaýgyrmarys.
Bägül KÄLLIÝEWA.
Oguzhan etrabynyň Şatlyk şäherindäki çagalar sungat
mekdebiniň dutar mugallymy.
SURATDA: okuwçylaryň taýýarlyk görýän pursaty.
