Sylaglaryňyz gutly bolsun
12.12.2024
Berkarar döwletiň täze eýýamynyň Galkynyşy döwründe «Pähim-paýhas ummany Magtymguly Pyragy» ýylynyň dabaralary älem içre ýaň salýar. Adyndan belli bolşy ýaly, bu ýylda akyldar şahyrymyz Magtymguly Pyragynyň doglan gününiň 300 ýyllygy halkara derejesinde dabaralanýar. Bu bolsa, Gahryman Arkadagymyzyň, Arkadagly Gahryman Serdarymyzyň dana şahyrymyzyň baý döredijiligine goýýan belent sarpasynyň aýdyň nyşanydyr.
Türkmen halkynyň Milli Lideri Gahryman Arkadagymyzyň Türkmenistanyň «Magtymguly Pyragynyň 300 ýyllygyna» atly ýubileý medaly we ýadygärlik nyşany bilen sylaglanylmagy, şeýle-de, Magtymguly adyndaky halkara baýragynyň berilmegi, hormatly Prezidentimiz Arkadagly Gahryman Serdarymyzyň Türkmenistanyň «Magtymguly Pyragynyň 300 ýyllygyna» atly ýubileý medaly we ýadygärlik nyşany bilen sylaglanylmagy bütin halkymyzyň şatlygyny goşalandyrdy. Bu şatlykly habar hemmeleriň göwün guşuny ganatlandyrdy. Eziz Watanymyzy hemmetaraplaýyn ösdürmekde, dünýä döwletleri we abraýly halkara guramalary bilen hyzmatdaşlygy, dost-doganlyk gatnaşyklaryny pugtalandyrmakda, türkmen halkynyň medeni-ruhy gymmatlyklaryny dünýä ýaýmakda, ýurdumyzyň ýaş nesillerini ata-babalarymyzdan gelýän milli ruhda terbiýelemekde beýik tagallalary edýän Arkadagly Gahryman Serdarymyza bu günki gün alkyş sözleri ýaňlanýar.
Türkmenistanyň “Magtymguly Pyragynyň 300 ýyllygyna” atly ýubileý medaly we ýadygärlik nyşanlarynyň gowşurylyş dabarasy welaýat häkimliginiň mejlisler zalynda hem geçirildi. Dabarada welaýatyň häkimi Begençmyrat Orazowa, welaýatyň häkiminiň orunbasary, welaýat zenanlar bölüminiň başlygy Çemen Akyýewa, Türkmengala etrabynyň Hasyl geňeşliginiň ýaşaýjysy, pensioner Ogulgerek Şakulyýewa Türkmenistanyň «Magtymguly Pyragynyň 300 ýyllygyna» atly ýubileý medaly we ýadygärlik nyşanlary dabaraly ýagdaýda gowşuryldy.
Dabaranyň dowamynda welaýatymyzyň sungat ussatlarynyň ýerine ýetirmeginde Berkarar döwletiň täze eýýamynyň Galkynyşy döwrüni, Gahryman Arkadagymyzy, Arkadagly Gahryman Serdarymyzy wasp edýän aýdymlar belentden ýaňlandy.
Aýparça AKYMOWA.
«Maru — şahu jahan».
SURATLARDA: dabaradan pursatlar.
Suratlary düşüren Şamyrat AMADOW.
