Sport. Sport. Sport.
04.12.2023
Berkarar döwletiň täze eýýamynyň Galkynyşy döwründe gözel Diýarymyzda hormatly Prezidentimiziň parasatly baştutanlygynda ýaşlary sporta çekmekde taýsyz tagallalar edilýär. Ýaş türgenleri ýüze çykarmakda hem-de olaryň sporta bolan höwesini artdyrmakda bimöçber işler alnyp barylýar. Ýaşlaryň ukyp-başarnygyny ýüze çykarmakda tälimçiler yhlasly işleýärler.
Çagalykdan ene-atasynyň ýakyndan ýardam bermegi bilen özleriniň saýlap alan ugry boýunça sport mekdeplerine yzygiderli gatnap, başarnyklaryny artdyrýarlar. Şeýle türgenleriň biri-de Mary şäherindäki 14-nji orta mekdebiň 7-nji synp okuwçysy Resul Gurbanowdyr.
R.Gurbanow 5 ýaşyndan başlap, sportuň taekwon-do WT görnüşi bilen içgin gyzyklanyp, Mary şäherindäki 8-nji sport mekdebine gatnap başlaýar. Ol gatnap başlan döwründen guralýan ýaryşlara yzygiderli gatnaşyp, baýrakly orunlara mynasyp bolýar. Oňa gara guşagyň 3-nji danynyň eýesi Abdy Abdyýew tälim berýär. Dürli ýaryşlara gatnaşyp, baýrakly orunlara mynasyp bolmagy Resulda sporta bolan höwesi barha artdyrýar.
Ýaşajyk türgen, gara guşagyň 1-nji danynyň eýesi Resul Gurbanow üstümizdäki ýylda Mary şäheriniň birinjiligini almak ugrundaky ýaryşda 40 kg. agramda çykyş edip 1-nji orna, welaýatymyzyň birinjiligini almak ugrunda 2011 — 2012-nji ýylda doglan türgenleriň arasyndaky ýaryşda 2-nji orna, welaýatyň kubogyny almak ugrundaky 2011 — 2012-nji ýylda doglan türgenleriň arasyndaky ýaryşda 39 kg. agram bilen 1-nji orna, şeýle hem paýtagtymyz Aşgabat şäherinde Koreýa Respublikasynyň ilçihanasynyň kubogyny almak ugrunda geçirilen ýaryşda 37 kg. agramda çykyş edip 1-nji orna mynasyp boldy.
Biz hem Resul jigimize saýlap alan hünärinde üstünlikleriň, ýeňişleriň ýar bolmagyny arzuw edýäris.
Şemşat SAÝLYÝEWA.“Maru — şahu jahan”
SURATDA: ýaş türgen Resul Gurbanow.
