Oba hojalygy: işler utgaşykly barýar
27.02.2021
Adamyň ekleýjisi bolan ýerden bol hasyl alýan obahojalykçylar iki tarapa-da bähbitli bolan iş usullarynda zähmet çekmegi halaýarlar. Indi birnäçe ýyldan bäri daýhan hojalyklary döredilýär. Welaýatymyzda bu ugurda Baýramaly etraby has işjeňlik görkezýär. Döwlete bugdaý, pagta, gant şugundyryny, gök, bakja we beýleki önümleri tabşyrmakda abraýly netijelere eýe bolýan etrabyň birnäçe daýhan hojalyklary bar. Öňki “Mekan” daýhan birleşiginiň esasynda birnäçe daýhan hojalyklary döredildi. Olaryň birine tejribeli obahojalykçy Eziz Wallykow ýolbaşçylyk edýär. “Melhemli güller” diýlip atlandyrylan bu daýhan hojalygy 974 gektar ýere eýelik edýär. Bu barada E. Wallykow şeýle gürrüň berýär:
— Biziň daýhan hojalygymyzyň 300 gektardan gowrak ýerindäki bugdaýa agrotehniki talaplara görä ideg edilýär. Türkmenistan — parahatçylygyň we ynanyşmagyň Watany ýylynda 260 gektara gowaça ekmegi meýilleşdirýäris. Bu ekine degişli ýerlerimiz göwnejaý şüdügärlenildi. Häzirki günlerde topragy tekizlemek, oňa geriş çekmek işlerini alyp barýarys. Şeýle derwaýys işlerde etrap tehniki hyzmat ediş kärhanasynyň tehnikalarynyň ýerine ýetirýän işleri uludyr.
Elbetde, ene ýere päk zähmetiňi siňdirseň, oňa degişli dökündir tehniki hyzmatlary gurasaň, mele toprak baýlygyny eçilýär. Bu daýhan hojalygynyň daýhanlarynyň bolsa, zähmet çekmäge bolan höwesleri ýokary derejede .
Biz daýhan hojalygynyň ýerlerinde bolanymyzda adamlaryň örän höwesli işleýändiklerine göz ýetirdik. Onuň agzalary Hydyr Ýazmuhammedow, Muhammetmyrat Aşyrow, Berdimyrat Sytdyhow, Baýramgeldi Ataýew, şeýle-de beýleki daýhanlar häzirki günleriň jogapkärli işlerinde has göreldeli zähmet çekýärler.
Öwezmyrat POLLYÝEW.
SURATDA: ýerleriň ýaz ekişine taýýarlanyşyndan pursat.
Surata düşüren Azym ŞEKEROW.
