Mirasym bar — buýsanjym bar
23.12.2022
Halkymyzyň durmuşynda ýatdan çykmajak ajaýyp pursatlary galdyryp, tamamlanyp barýan Halkyň Arkadagly zamanasy ýylynyň taryhy wakalary biziň her birimizde uly ruhubelentlik döredýär.
Hemmämize mälim bolşy ýaly, golaýda — 2-nji dekabrda hormatly Prezidentimiz sanly ulgam arkaly Ministrler Kabinetiniň nobatdaky mejlisini geçirdi. Şol mejliisde Arkadagly Serdarymyz Türkmenistanyň «Türkmen keşdeçilik sungaty» atly hödürnamasynyň esasynda türkmen keşdeçilik sungatyny ÝUNESKO-nyň Adamzadyň maddy däl medeni mirasynyň sanawyna goşmak baradaky çözgüdiniň biragyzdan kabul edilendigi bilen halkymyzy gutlady. Bu hoş habaryň gelip gowuşmagy bilen biz türkmeniň keşdeçilik sungatynyň bütin dünýäni haýrana goýýandygyna aýdyň göz ýetirdik.
Türkmen halky hemişe-de gözelligiň gözleginde bolupdyr. Esasanam, türkmen zenanynyň milli lybaslaryna, geýinmek medeniýetine uly üns berlipdir. Zenanlarymyzyň nepislik bilen sünnäläp bejerýän el işleriniň her birini synlanyňda, gözellige teşne didelerimiz şeýle täsinlikden ganyp doýmaýar. Keşdeçilik sungaty bilen meşgullanýan gyz-gelinler bu inçe sungatyň özüne çekiji gudratynyň hem-de özboluşly aýratynlygynyň bardygyny buýsanç bilen belleýärler. Ýokarda belleýşimiz ýaly, türkmeniň keşdeçilik sungatynyň ÝUNESKO tarapyndan Adamzadyň maddy däl medeni mirasynyň sanawyna girizilmegi geljekde-de, dostlukly halklaryň medeni gatnaşyklarynyň has-da berkejekdigini şöhlelendirýär.
Türkmeniň milli buýsanjy hasaplanylýan keşdeçilik sungaty gelin-gyzlarymyzyň el hünärinden, ýürek yhlasyndan döreýän gudratdyr. Şeýle gudraty bize miras galdyran ata-babalarymyzyň arzuwlary Berkarar döwletiň täze eýýamynyň Galkynyşy döwründe hasyl bolýar. Çünki, «El hünäri — il gezer» diýlişi ýaly, türkmeniň keşdeçilik sungaty bu günki gün dünýä mirasynda giň orun aldy. Munuň üçin milli mirasymyzy dünýä çykarýan Gahryman Arkadagymyza hem-de Arkadagly Serdarymyza köp sagbolsun aýdýarys.
Bahargül MEJIDOWA.
«Maru — şahu jahan».
TZB-niň welaýat bölüminiň geňeş agzasy.
