Döwlet Maslahatyndan soňky oýlanmalar
14.10.2022
Golaýda «Mary» myhmanhanasynyň mejlisler jaýynda TDP-niň welaýat, şäher komitetleriniň bilelikde guramagynda «Türkmenistanyň Döwlet Maslahaty: Arkadagly Serdarymyzyň ösüş syýasatynyň dabaralanmasy» atly maslahat geçirildi. Oňa Türkmenistanyň Milli Geňeşiniň Mejlisiniň deputatlary, TDP-niň welaýat, şäher komitetleriniň jogapkär işgärleridir işjeň agzalary we ýaşuly nesliň wekilleri gatnaşdylar.
Döwlet Maslahatyna bagyşlanan bu çärede TDP-niň welaýat komitetiniň bölüm müdiri, «Gaýrat» medalynyň eýesi Myrat Ataýew, Türkmenistanyň hormatly il ýaşululary — Wekilbazar etrabynyň ýaşaýjysy Allaýar Allakow, Garagum etrabynyň ýaşaýjysy Jumadurdy Hydyrow, Türkmengala etrabyndaky 35-nji orta mekdebiň mugallymy, «Zenan kalby» ordeniniň eýesi Orazsoltan Annaorazowa, Türkmengala etrap hassahanasynyň çaga dogrulýan bölüminiň müdiri, Türkmenistanyň Milli Geňeşiniň Mejlisiniň deputaty Sapargylyç Süleýmanow, TDP-niň şäher komitetiniň başlygy Hekimberdi Orazberdiýew we beýlekiler çykyş etdiler. Çykyşlarda üstümizdäki ýylyň 23-nji sentýabrynda mukaddes Garaşsyzlygymyzyň 31 ýyllygynyň öň ýanynda ýokary guramaçylykly geçirilen Döwlet Maslahatynda Garaşsyzlyk ýyllary içinde gazanylan ösüşler, ýetilen belent sepgitler, ýurdumyzy mundan beýläk-de durmuş-ykdysady we medeni taýdan ösdürmek, halkymyzyň ýaşaýyş-durmuş şertlerini has-da gowulandyrmak barada öňde goýlan wezipeler, hormatly Prezidentimiziň eden taryhy çykyşy barada giňişleýin durlup geçildi. Maslahatda çykyş edenler şeýle asuda döwletde döredijilikli zähmet çekýändikleri üçin ýürek buýsançlaryny beýan etdiler we hemmelere uly üstünlikleri arzuwladylar.
Maslahatyň dowamynda joşgunly elçarpyşmalaryň astynda Garaşsyz, hemişelik Bitarap Türkmenistan döwletimizi ösüşiň täze belentliklerine tarap alyp barýan Gahryman Arkadagymyzyň, Arkadagly Serdarymyzyň adyna alkyşly sözler aýdyldy.
B. JUMADURDYÝEWA.
SURATLARDA: maslahatdan pursatlar.
Suratlary düşüren Şamyrat AMADOW.
