Wagyz - nesihat çäreleri
12.02.2021
Berkarar döwletimiziň bagtyýarlyk döwründe il-günümiziň asuda, abadan durmuşyny üpjün etmekde uly tagallalar edilýär. Tebigy we tehnogen häsiýetli adatdan daşary ýagdaýlarda halas ediş işlerini guramaçylykly ýola goýmak, şeýle ýagdaýlara hemişe taýýar bolmak bilen bagly wezipelere-de hemişe uly üns berilýär. Şu maksat bilen golaýda welaýat häkimliginiň mejlisler zalynda okuw-maslahat geçirildi.
Maslahata welaýat häkimliginiň ýolbaşçylary, jogapkär işgärleri, etrap, şäher häkimleriniň orunbasarlary, Türkmenistanyň Goranmak ministrliginiň welaýat raýat goranyşy we halas ediş işleri müdirliginiň serkerdeleri, şu müdirligiň raýat goranyşyna taýýarlamak we gaýtadan taýýarlamak bölümçesiniň şahsy düzümi gatnaşdylar.
Maslahaty welaýatyň häkimi Döwranberdi Annaberdiýew açyp, raýat goranyşynyň we adatdan daşary ýagdaýlarda halas ediş işleriniň häzirki döwründäki möhüm ähmiýeti barada durup geçdi. Bu barada welaýatyň etrap, şäher häkimlikleriniň öňünde durýan wezipeleriň anyk kesgitlenilmeginiň zerurlygyny belledi. Soňra welaýat häkiminiň orunbasary Arslan Atalyýew okuw-maslahatyň maksadyny düşündirdi. Şeýle-de, bu okuw-maslahatda Türkmenistanyň Goranmak ministrliginiň welaýat raýat goranyşy we halas ediş işleri müdirliginiň serkerdesi, podpolkownik Döwran Geldiýew giňişleýin çykyş edip, welaýat, etrap, şäher häkimlikleriniň dolandyryş merkezleriniň guramaçylykly göçüriş toparlarynyň, adatdan daşary ýagdaýlar baradaky toparlarynyň başlyklarynyň raýat goranyşy baradaky borçlary we hukuklary barada gürrüň berdi. Şu müdirligiň raýat goranyşyna taýýarlamak we gaýtadan taýýarlamak bölümçesiniň müdiri, maýor Nurgylyç Ýarjanow öz çykyşynda raýat goranyşynyň harby bölümleriniň şahsy düzüminiň, edara-kärhanalaryň, guramalaryň, raýat goranyşynyň birikmeleriniň ýolbaşçylarynyň we hünärmenleriniň ilaty raýat goranyşy boýunça taýýarlamagyň we gaýtadan taýýarlamagyň tertibi barada durup geçdi.
Okuw-maslahatyň barşynda oňa gatnaşanlar bilen ýokarda gürrüňi edilen meseleler boýunça okuw geçirildi. Wajyp wezipeleriň oňyn çözgüdini gazanmaga gönükdirilen meseleler bilen jikme-jik tanyşdyryldy.
A. BAÝRAMOW.
SURATLARDA: maslahatdan pursatlar.
Suratlary düşüren Şamyrat AMADOW.
