Bilimli nesil — kuwwatly Watan
17.03.2022
Ýakynda Mary şäherindäki daşary ýurt dillerine ýöriteleşdirilen 23-nji orta mekdepde Tawus Saparowanyň guramagynda şäher derejesinde görelde sapagy geçirildi. Iňlis dilinde alnyp barlan bu sapak örän täsirli boldy.
Sapagyň başynda Tawus mugallym arassaçylyk düzgünleri, ýol hereketiniň kadalary hakynda gysgaça durup geçdi we okuwçylar bilen birlikde “Paýhas çeşmesi” kitabyna esaslanyp, nakyllar bilen baglanyşykly pikirleniş meselelerini çözdi. Şeýle-de, okuwçylar munuň bilen baglanyşykly birnäçe gönükmeleri işlediler.
Sapagyň dowamynda Tawus mugallym okuwçylara öten zaman işligini multimediýa tagtasyndan peýdalanyp, slaýdlaryň üsti bilen düşündirdi. Bu tema bilen baglanyşykly wideo şekilini görkezdi hem-de okuwçylar bilen dürli gönükmeleri işledi. Iňlis dilindäki goşgyny terjime etmek, krosswordy çözmek ýaly sapagy berkidiji gönükmeler bolsa has-da gyzykly hem çekeleşikli boldy. Mugallym okuwçylary bahalandyryp, olara öý işini tabşyrdy. Tawus mugallymyň geçiren bu görelde sapagynyň hemmeler üçin täsirli bolandygyny oňa gatnaşyjy mugallymlar aýtdylar.
Sülgün ŞADYÝEWA.
“Maru — şahu jahan”.
SURATDA: görelde sapagyndan pursat.
Surata düşüren Şamyrat AMADOW.
