Galla — 2021
06.07.2021
Watan harmanyna 345 müň tonnadan gowrak guşgursak bugdaý dänesini tabşyran welaýatymyzyň edermen gallaçy daýhanlary, Türkmenistan — parahatçylygyň we ynanyşmagyň Watany ýylynyň galla taýýarlamak baradaky şertnamalaýyn borçnamasyny üstünlikli ýerine ýetirdiler.
Oba hojalyk pudagynyň çalt depginler bilen ösdürilmegi milli Liderimiziň alyp barýan döwlet syýasatynyň ileri tutulýan ugurlarynyň biridir. Ýurdumyzda azyk howpsuzlygynyň üpjün edilmegi ilatyň ýaşaýyş derejesi bilen aýrylmaz baglanyşyklydyr. Gallaçy daýhanlarymyzyň bu gazanan zähmet ýeňşi obasenagat toplumyny ösdürmek baradaky edilýän aladalara, netijeli zähmet çekmek babatda döredilen şertler üçin hormatly Prezidentimize mynasyp jogapdyr.
Zähmetiň mehanizmleşdirilmegi we awtomatlaşdyrylmagy oba hojalyk önümçiliginiň netijeliligini ösdürmegiň esasy girewidir. Hormatly Prezidentimiziň daşary ýurtlardan satyn alyp berýän ýokary öndürijilikli kombaýnlary netijeli ulanylyp, galla oragy ýokary depginlerde guramaçylykly alnyp baryldy. Ýer we suw serişdeleriniň netijeli ulanylmagy, tehniki hyzmatlaryň, mineral dökünleriň, ýokary hilli tohumlaryň hem-de oba hojalyk ekinlerini zyýankeşlerden goramagyň himiki serişdeleri bilen döwletimiz tarapyndan ýeňillikli bahalardan üpjün edilmegi ýokary netijeleri gazanmaga öz täsirini ýetirdi.
Oba hojalyk önümlerini öndürmek babatda çykdajylary maliýeleşdirmek üçin ýeňillikli şertlerde berilýän karz serişdeleri, oba hojalyk önümleriniň, şol sanda bugdaýyň satyn alyş nyrhlarynyň yzygiderli ýokarlandyrylmagy, döwletiň önüm öndürijiler bilen hasaplaşyk ulgamynyň kämilleşdirilmegi oba hojalyk işgärleriniň zähmet öndürijiligini ösdürmek üçin täsirli çäreleriň esasy özenini düzýär.
Welaýatymyzyň gallaçylary mukaddes Garaşsyzlygymyzyň 30 ýyllyk toýunyň toýlanylýan ýylynda yhlaslaryny gaýgyrman, öndürijilikli zähmet çekip, oba hojalyk önümleriniň bolçulygyny has-da artdyrmak hyjuwy bilen gaýratly işleýärler.
Ekerançylyk meýdanlarynda bugdaý oragy soňky gektarlarda dowam edýär. Meýdanlarda galan hasyly iň soňky dänesine çenli zaýasyz ýygnap almak ugrundaky işler ýokary guramaçylyk derejesinde alnyp barylýar.
Edermen gallaçy daýhanlarymyza toprakdan bol hasyl öndürip, zähmet ýeňişlerini gazanyp, eşretli durmuşda ýaşamaga döredýän mümkinçilikleri üçin Gahryman Prezidentimiziň jany sag, ömri uzak bolsun, il-ýurt bähbitli, dünýä ähmiýetli tutumly işleri mydama rowaçlansyn!
Sähet HOJAGELDIÝEW.
“Maru — şahu jahan”.
SURATDA: welaýatymyzyň gallaçylarynyň gazanan zähmet ýeňşine bagyşlanan dabaradan pursatlar.
Surata düşüren Şamyrat AMADOW.
