Bilimli nesil — kuwwatly Watan
14.04.2021
Bagtyýar zamanamyzda Gahryman Arkadagymyz ýaş nesliň döwrebap bilim almagy ugrunda ähli mümkinçilikleri döredýär. Gözel Diýarymyzyň ähli künjeklerinde häzirkizaman enjamlary bilen enjamlaşdyrylan mekdeplerdir çagalar baglary gurlup, ulanylmaga berilýär. Hormatly Prezidentimiziň saýasynda ulanylmaga berlen mekdepleriň biri hem Serhetabat etrabyndaky 2-nji orta mekdepdir.
2 gatdan ybarat, döwrebap mekdep 624 okuwça niýetlenendir. Bu mekdepde ýaş nesle bilim bermekde tejribeli mugallymlar arman-ýadaman zähmet çekýärler. Mekdebe Täzegül Ýazlyýewa ýolbaşçylyk edip, mugallymlaryň agzybirlikde zähmet çekip, okuwçylaryň bilim-terbiýe almaklary ugrunda uly tagallalary edýär.
Şeýle amatly şertlerden netijeli peýdalanýan halypa mugallymlar Baýmyrat Hezretgulyýew, Taňryguly Seýitjanow, Aýna Gurbangeldiýewa, Kümüş Meredowa, Agaröwşen Halmyradow, Baýmyrat Ýazmyradow okuwçylaryň oňat bahalar alyp, çekýän zähmetleriniň ýerine düşmegi ugrunda yhlas edýärler.
Olar okuwçylara häzirki döwürde döreýän ýokanç kesellerden goranyp, ellerini ýygy-ýygydan ýuwup, agyz-burun örtüklerini dakynmagy, köpçülik ýerlerinde 2 metr aralygy saklamagy hem-de arassaçylyk düzgünlerini berk berjaý etmeklerini ýatladyp durýarlar.
Mekdebiň müdiri Täzegül Ýazlyýewa, müdiriň okuw işleri baradaky orunbasary Yslam Işanow, informatika mugallymlary Kümüş Meredowa, Agaröwşen Halmyradow dagy hormatly Prezidentimiziň “Türkmenistanyň dermanlyk ösümlikleri” atly 12 jiltlik kitabyndan «Bathyz» döwlet tebigy goraghanasynda bar bolan dermanlyk otlar bilen tanşyp, yzygiderli pikir alyşýarlar.
Maýa DAŇATAROWA.
SURATDA: mekdep müdiri Täzegül Ýazlyýewanyň mugallymlar bilen pikir alyşýan pursaty.
