Tohumyňyz müňlesin, edermen pagtaçylar!
27.03.2025
Halkara parahatçylyk we ynanyşmak ýylynyň ýaz paslynyň gelmegi bilen welaýatymyzyň edermen babadaýhanlary, ýer eýeleri, 2025-nji ýylyň 26-njy martynda täze hasylyň düýbüni tutmak işine irgözinden taýýarlykly geldiler.
Arkadagly Gahryman Serdarymyzyň ak patasyna eýerip, welaýatymyzda gowaça ekişine girişmäge bagyşlanyp, welaýat häkimliginde maslahat geçirildi. Maslahatda şäher, etrap häkimleri we olaryň orunbasarlary, welaýat häkimliginiň jogapkär işgärleri, Türkmenistanyň Mejlisiniň deputatlary, welaýatymyzyň oba hojalyk edara-kärhanalarynyň, jemgyýetçilik guramalarynyň ýolbaşçylary, hünärmenleri, daýhan birleşikleriniň başlyklary, arçynlary, agronomlar, tejribeli kärendeçiler, il sylagly ýaşulular we ýaşlar gatnaşdylar.
Welaýat häkimliginde geçen maslahaty welaýatyň häkimi Begençmyrat Orazow açdy we alyp bardy. Welaýatyň häkimi şu ýylyň 26-njy martynda gowaça ekişine girişmäge babadaýhanlarymyza hormatly Prezidentimiziň ak pata berendigini aýtdy. Ýerleriň, tehnikanyň, ýokary hilli tohumlyk çigidiň taýýardygyny, gowaça ekişini ýokary hilli geçirmäge hemme mümkinçilikleriň döredilendigini belläp geçdi.
Soňra maslahatda welaýat häkiminiň orunbasary Şagylyç Berdiýew, Mary etrabynyň ýaşaýjysy, Türkmenistanyň hormatly il ýaşulusy Amangeldi Myradow, “Marypagta” önümçilik birleşiginiň baş direktory Nurmuhammet Akmyradow, Sakarçäge etrabyndaky “Kuwwatly” hojalyk jemgyýetiniň esaslandyryjysy Rejepgeldi Şajaýew, Wekilbazar etrabynyň “Bereket” daýhan birleşiginiň kärendeçisi Sähet Nökerow çykyş edip, gowaça ekişi möwsüminde kärendeçileriň, ýer eýeleriniň, mehanizatorlaryň öndürijilikli zähmet çekmekleri üçin gerekli bolan ähli mümkinçilikleriň döredilendigini nygtadylar.
Gowaça ekişine kemsiz taýýarlanan Wekilbazar etrabynyň “Türkmenistan” daýhan birleşiginiň ekin meýdanyna ýygnanan adamlaryň ruhlary belent. Giň meýdanyň daş-töweregini gurşap duran traktorlar, oba hojalyk gurallary, tehnikalaryň gowaça ekişine taýýarlygyny äşgär edýär. Hatara guralan ak öýler, medeniýet we sungat işgärleriniň bezemen sahnadaky şowhunly çykyşlary, bu ýerde guralan pagta, pagtadan önýän önümleriň sergileri märekäniň ünsüni özüne çekýär.
Çäräniň dowamynda ýerleriň gowaça ekişine taýýarlanylyşy, tohumlyk çigitleriň görnüşleri barada “Marypagta” önümçilik birleşiginiň hünärmenleri öz degerli maslahatlaryny berdiler.
Dabaraly pursat gelip ýetdi. Welaýatymyzyň işjanly pagtaçylarynyň Halkara parahatçylyk we ynanyşmak ýylynyň bereketli hasyly üçin 162 müň gektar ýere gowaça ekmek ugrundaky sogaply işiniň başy başlanyldy.
Hormatly Prezidentimiz Serdar Berdimuhamedowyň ak pata bermegi bilen il hormatly ýaşulularymyz ýagşy dileg-arzuwlar bilen topraga bereket tohumyny sepdiler. “Ýylymyz rysgally bolsun, berekede beslensin” diýen, dilegler bilen gowaça ekiji tehnikalar herekete girizildi.
Tohumyňyz müňlesin, ýylyňyz rowaç bolsun, hormatly babadaýhanlar!
Sähet HOJAGELDIÝEW.
“Maru — şahu jahan”.
SURATLARDA: welaýatymyzda gowaça ekişine girişilmeginden pursatlar.
Suratlary düşüren Şamyrat AMADOW.
